Almar Steinn Atlason: Útför á sólarströnd

MUTT kynnir sýningu Almars Steins Atlasonar Útför á sólarströnd sem opnuð verður sunnudaginn 11 apríl frá kl. 13 – 18.

Á sýningunni verða sýnd verk sem listamaðurinn vann frá 2016-2017 á eyjunni La Réunion í Indlandshafi. Þar bjó hann í sendibíl og fékkst við málverk, fegurð og sorg. Verkin hafa ekki verið sýnd áður hér á landi. Í því sem Almar lýsir sem brjálæðislegri tjáningarþrá og af yfirgengilegu skilningsleysi uðru verkin til. Óreiða sem einkennir mörg verkanna við fyrstu sýn er vandlega uppbyggð og stærðfræðilega útreiknuð. Innri óreiða og brestir opinberast í verkunum með hráum krafti þar sem þau leitast við að sýna okkur óþægilega en fallega tilvist á heiðarlegan hátt.

Um tilurð verkanna segir Almar:
„Ég var að reyna að tjá upplifun af kaotískum heimi á skipulagðan máta. Það var mission-ið. Ég ætlaði að finna fagurfræðina sem er í hellamálverkum, barnateikningum og innblásnum ræðum þeirra sem hafa einungis yfirborðsþekkingu á umræðuefninu en hafa til að bera þess betra skap og eru jafnvel aðeins neðan í því. Svo strauk ég úr meðferð og flutti til Réunion. Þar, undir pálmatrjánum lærði ég að mála upp á nýtt. Mín skoðun er sú að við verðum fyrir svo tryllingslegum áhrifum og áreiti á hverjum degi að það sé enginn möguleiki að einu sinni gróf flokka það, hvað þá vinna úr því. En ég trúi á vinnu og mest trúi ég á erfiðisvinnu. Ef ég vinn og vinn og mála og mála allan daginn alla daga þá get ég kannski komist nálægt því að tjá einhver smá brot úr þeim tryllingslega innblæstri sem er fólginn, einfaldlega í því, að vera manneskja á lífi.“

Almar Steinn Atlason útskrifaðist með BA í myndlist úr Listaháskóla Íslands 2018. Gjörningar hans hafa vakið athygli á undanförnum árum en mest hefur hann þó fengist við málverk. Hann hefur haldið fjölda einkasýninga og tekið þátt í samsýningum bæði hér á landi og erlendis en þetta er önnur einkasýning hans þar sem hann sýnir málverk.

Sýningartími

11.04.2021 - 16.05.2021
Ongoing...

Frekari upplýsingar

Viðburður á Facebook
Mutt Galleri

Staðsetning

Mutt Galleri
Laugavegur 48, 101 Reykjavík
Vefsíða
https://facebook.com/muttreykjavik/
Viðburður á Facebook