Augað er líffærið sem tekur á móti því sem við sjáum. Heilinn vinnur úr ljósinu, meðtekur upplýsingarnar sem fanga athygli okkar og framkallar myndir. Þannig sést aðeins hluti af því sem fyrir augu ber, og þannig erum við aðeins meðvituð um lítinn hluta af því sem við sjáum.

House of Purkinje, einkasýning Amanda Riffo er sviðsetning á raunveruleikanum. Titillinn vísar til tékkneska lífefnafræðingsins Jan Evangelista Purkyně sem meðal annars uppgötvaði samverkandi og margfaldar speglanir af einni einstakri fyrirmynd sem birtast á yfirborði augans og innan úr því. Eins og margföld speglun sjálfsins.

Með House of Purkinje setur Amanda fram hliðstæður á milli lífeðlisfræði augans og meðvitundar okkar gagnvart umhverfinu. Þetta gerir hún með því að etja sýningarrýminu saman við kvikmyndaver, en Amanda hefur starfað í kvikmyndaiðnaðinum næstum jafn lengi og hún hefur starfað sem myndlistarmaður. Á báðum sviðum vinnur hún með afbakaða hluti, skáldaðar myndir og stöðugar vangaveltur um hvernig við skynjum umhverfi okkar.