Ásgerður Birna Björnsdóttir (f. 1990) lauk BA-prófi í myndlist frá Gerrit Rietveld Academie í Amsterdam árið 2016.
Verk hennar eiga sér stað á breiðum efnislegum skala; örfínar agnir, kílómetrar af rafmagnsvír, torkennileg lykt eða blikkandi augu á saklausum símaskjá. Birna laðast að því sem virðist vera á barmi þess að vera til; hið ósnertanlega og ósýnilega. Í myndheimi Birnu er tilvera hlutar eða hugmyndar gjarnan undirstrikuð með fjarveru hennar.

Ásgerður Birna er einn stofnenda Laumulistasamsteypunnar, GSM (sýningarrýmis í hljóð-bylgjum) auk þess sem hún rak sýningarrýmið at7 í Amsterdam 2017-2019. Verk Birnu hafa meðal annars verið sýnd í Nýlistasafninu, Cosmos Carl, Kling og Bang, at7 sýningarrými, Elswhere Museum, Open, Sequences VIII og á heimasíðu bandaríska tímaritsins Art in America. Hún tók einnig þátt í Haustlaukum – Ný myndlist í almannarými á vegum Listasafns Reykjavíkur árið 2019.

Sýningaröðin í D-sal hóf göngu sína árið 2007. Hér er listamönnum sem hafa mótandi áhrif á íslenska myndlistarsenu boðið að halda sína fyrstu einkasýningu í opinberu safni.

Sýningarstjóri: Edda Halldórsdóttir