Loading Events

« All Events

  • This event has passed.

Brák Jónsdóttir: Dýpra

21 maí10 júlí

Á sýningunni Dýpra | Deeper kannar Brák snertifleti blætismenningar og garðyrkju, manns og náttúru, sársauka og unaðar. Í þeim tilgangi að nálgast náttúruna á hátt sem ögrar hefðbundnum hugmyndum um hvernig menning og náttúra mætast. Sýningin byggir á rannsókn listamannsins á sambandi líkama og gróðurs. Brák leikur sér að hugmyndum garðyrkjunnar um beislun náttúrunnar innandyra en sýningin teygir anga sína einnig út í garð, á sameiginlegt yfirráða svæði manns og náttúru. Inni hanga ýmis verkfæri, eða eru þetta leikföng? Hvort þau eru ætluð til ástarleikja eða garðyrkju er erfitt að sjá, enda þarf annað ef til vill ekki að útiloka hitt. Í garðinum hefur einhver verið iðin í beðinu og nú virðist blómgun hafa átt sér stað og kynlegur ávinningur ætlar að verða af því.

Í ferli listamannsins er jörðin í hlutverki þess undirgefna í leik þar sem garðyrkjumaðurinn gælir við mörk hennar. Leikvangurinn er skapaður á forsendum hins undirgefna en reglurnar eru settar af drottnaranum. Af ástríðu leitast listamaðurinn við að komast dýpra, dýpra í jörðina. Þetta valdatafl byggir á ábyrgð, nánd og virðingu sem felur í sér umhyggju í garð viðfangsins. Roðandi spenna myndast við leikinn þegar mörk beggja eru þanin til hins ýtrasta.

Sú blætismenning sem Brák sækir til býr yfir gildishlaðinni fagurfræði og myndmáli sem er til grundvallar þess að virkja minni gróðurhússins og framkalla spennu. Holdleg rannsóknin ber af sér niðurstöður sem ögra ef til vill hefðbundnum hugmyndum um nánd og samband manns við náttúru. Með þeim afleiðingum að mörkin á milli líkama og umhverfi hans verða óljósari. Á sýningunni Dýpra | Deeper eru ýmsar vísbendingar um þessar niðurstöður en hún skilur eftir eyður fyrir áhorfandann til að fylla inn í. Þannig gerir hún kröfu til hans um að horfast í augu við eigin hugmyndir og velta fyrir sér forsendum þeirra.

Textann skrifaði: Odda Júlía Snorradóttir

Brák Jónsdóttir er fædd árið 1996. Hún útskrifaðist með BA gráðu úr myndlistardeild Listaháskóla Íslands árið 2021. Verk hennar taka helst á sig form vídjóverks, bókverks, skúlptúrs og gjörnings, en nýverið hafa viðfangsefni hennar snúið að sambandi manneskju við náttúru. Í rannsóknum sínum nálgast hún kink og blæti og skoðar samband mannfólks og náttúrulegra kerfa á grundvelli yfirráða og undirgefni, fantasíu og femínisma.

Details

Start:
21 maí
End:
10 júlí
Event Tags:
,
View Event Website

Venue

Ásmundarsalur
Freyjugata 41
Reykjavík, 101 Iceland
+ Google Map
View Venue Website