Höggmyndalist Carls Boutard hefur þróast út frá staðfastri ástríðu listamannsins fyrir umhverfinu, einkum undir beru lofti. Verk hans eru gjarnan unnin í samhengi við almannarými og þau endurspegla tengsl á milli manns, náttúru og menningar. Carl lýsir sér sem „gamaldags myndhöggvara“ og vísar þá til áherslu sinnar á efni og form og þá virkni verkanna að þau taki breytingum eftir því frá hvaða sjónarhorni horft er á þau. Þar má gjarnan sjá tilraunir með tómarúm eða op inni í mótaðri umgjörð. Verkin kunna að virðast óhlutbundin en þau eru iðulega dregin af náttúrulegum formum sem finna má agnarsmá í jurtaríkinu eða gríðarstór í himingeiminum.

Fjölmargt í listsköpun Carls Boutard á sér samsvörun í ævistarfi Ásmundar Sveinssonar.

Það er spennandi að sjá verk þessara myndhöggvara ólíkra tíma kallast á. Carl sýnir ný verk eftir sjálfan sig og velur verk Ásmundar til samtals við þau. Sýningin er hluti af sýningartvennu í Ásmundarsafni árið 2021 en sýning Sirru Sigrúnar Sigurðardóttur verður opnuð snemma árs og sýning Carls að hausti. Með þessum sýningum opnar Ásmundarsafn eftir mestu endurbætur frá því það var opnað almenningi árið 1986. Gestir öðlast nýja sýn á arfleifð hins gamalkunna og ástsæla listamanns í gegnum linsu tveggja samtímalistamanna og í hinu fallega umhverfi sem Ásmundarsafn og garðurinn í kring móta.

Carl Boutard er fæddur 1975 í Kiruna, Svíþjóð og stundaði nám við Malmö Art Academy og Listaháskóla Íslands í Reykjavík. Auk þess hefur hann lært arkitektúr við Konunglegu tækniháskólann í Stokkhólmi. Verk Boutards hafa verið sýnd í Listasafni Malmö, Lunds Konsthall, Sven-Harrys konstmuseum, Artipelag, Bonniers Konsthall og Centre Culturel Suédois í París. Boutard hlaut ISCP-styrkinn í New York árið 2015 og meðal verka hans í almannarými eru skúlptúrar í Stokkhólmi, Uppsölum, Karlstad, Lundi í Svíþjóð sem og í Heidenheim, Þýskalandi. Hann á verk í söfnunum í Malmö Art Museum, Public Art Agency Sweden og Skissernas Museum – Museum of Artistic Process and Public Art í Lundi. Carl er lektor við myndlistardeild Listaháskóla Íslands.