Á laugardaginn 18. júní kl. 16 opnar Einar Lúðvík Ólafsson sýninguna ‘Sannleikurinn þekkir raunveruleikann / Real Recognize Real’. Sýningin fjallar um sögu málverksins, goðsagnir og samtímann.

Einar nýtir sér sögu málverksins í verkum sínum; þær fjölmörgu listastefnur og stílbrigði sem upp hafa komið í gegnum tímann endurnýtir hann og setur í nýtt samhengi. Listasagan öll er notuð sem tungumál ásamt vísunum í samtímann til að fást við okkar sítengdu, samhengislausu og absúrd daglegu tilvist. Því að þrátt fyrir að hver einasti maður gangi um með nær alla heimsins þekkingu í vasanum, snjallsímann, virðast fréttir og falsfréttir nálgast að verða samheiti.

Málverk Einars gagnrýna bæði miðil málverksins og samfélagið. Þegar samfélagsbreytingar og -framfarir eru svo tíðar að tími fólks til endurskoðunar er kannski ekki lengur til staðar. Hverju skal taka alvarlega og hverju sem gríni?

Einar Lúðvík Ólafsson útskrifaðist með B.A. gráðu frá myndlistardeild Listaháskóla Íslands árið 2020, B.Sc úr tölvunarfræði frá Háskóla Íslands árið 2016. Hann hefur sýnt verk sín m.a. í Bandaríkjunum, Hollandi, Ástralíu og Líbanon.