‘Í öðru húsi’ er samsýning Guðlaugar Míu Eyþórsdóttur, Hönnu Dísar Whitehead og Steinunnar Önnudóttur.

Form sýningarinnar er híbýli. Höfundarnir draga upp vistarverur, ytri mörk og innri rými, en birta bara afmörkuð svæði. Verk höfundanna mætast í þessum senum og mynda framandlegan efnisheim sem formgerist í kunnuglegum sviðsetningum.
Í verkum Hönnu Dísar, Guðlaugar Míu og Steinunnar má finna sameiginlega strengi. Þær vinna gjarnan á mörkum myndlistar og hönnunar en í þessu verkefni mætast þær á landamærum þessara heima, og setja fram sýningu sem tilheyrir hvorum, heldur bregður sér undan slíkum skilgreiningum.

Guðlaug Mía Eyþórsdóttir (f.1988) útskrifaðist með BA gráðu frá Listaháskóla Íslands árið 2012 og stundaði síðar meistaranám í myndlist við Koninklijke Academie í Gent, þaðan sem hún útskrifaðist árið 2018. Í myndlist sinni skoðar Guðlaug skúlptúríska þætti í manngerðu umhverfi okkar, gaumgæfir þau form, áferðir og gjörðir sem nærumhverfi okkar samanstanda af og kannar hvort efnisgera megi daglegar athafnir. Að auki hefur hún staðið að margvíslegum verkefnum innan myndlistar og brugðið sér í hlutverk útgefanda, sýningarstjóra og rannsakanda. Á árunum 2012-19 stofnaði hún, ásamt hópi listamanna, sýningarrými Kunstschlager í Reykjavík og ABC Klubhuis í Antwerpen, Belgíu og situr nú í stjórn Nýlistasafnsins. Hún hefur verið virk í sýningarhaldi bæði hér heima og erlendis síðastliðinn áratug og var tilnefnd til hvatningarverðlauna Íslensku Myndlistarverðlaunanna árið 2020.

Hanna Dís Whitehead (f.1982) útskrifaðist með láði frá Design Academy Eindhoven árið 2011. Hún hefur sýnt víða hérlendis sem og erlendis svo sem Danmörku, Eistlandi, Englandi, Finlandi og Svíþjóð. Verk hennar eru staðsett á landamærum hönnunar, listar og handverks. Ferlinu er leyft að ráða ferðinni og farið er á milli mismunandi efna svo sem viðar, textíls og keramíkur innan sömu hugmyndar. Hanna Dís hefur sérstakan áhuga á að vekja upp samtal á milli hluta og áhorfenda þar sem hún vefur saman sögum, formi, litum og teikningu. Hún býr og starfar á Hornafirði.

Steinunn Önnudóttir (f. 1984) býr og starfar í Reykjavík. Hún lauk BA námi í grafískri hönnun við Gerrit Rietveld Academie árið 2009, og BA námi í myndlist (Audiovisual) árið 2011, einnig við GRA. Helstu sýningar eru Feigðarós Í Kling&Bang 2021, Non Plus Ultra í Listasafni Reykjavíkur 2019, Skúlptúr Skúlptúr í Gerðarsafni 2018, og Fallvelti Heimsins, á vegum Myndhöggvarafélagsins, 2018. Frá árinu 2014 hefur Steinunn rekið sýningarýmið Harbinger og hún er jafnframt hluti af útgáfusamstarfinu In volumes sem einbeitir sér að útgáfu bókverka. Árið 2019 hlaut Steinunnn viðurkenningu frá styrktarsjóði Svavars Guðnasonar og Ástu Eiríksdóttur.

Steinunn fæst fyrst og fremst við málverk og skúlptúra sem renna gjarnan saman hvort við annað. Hún gerir tilraunir með að kanna víddir málverksins, lætur það flýja flatneskju tvívíddar sinnar og verða hluti af þrívíðu umhverfi. Fyrir vikið verða verkin að líkamlegri upplifun þar sem hægt er að ganga í kring um þau eða jafnvel í gegnum þau. Steinunn leikur sér að því að spinna hugrenningatengsl á milli raunveru og sviðsetninga með verkum sínum, og vinnur gjarnan með hugtök eins og afbyggingu, sjónblekkingu, uppruna og eftirlíkingu.