Loading Events

« All Events

  • This event has passed.

Kjarval og samtíminn

27 september, 202116 janúar, 2022

Á sýningunni eru valin verk eftir listmálarann Jóhannes S. Kjarval (1885-1972) sem var frumkvöðull í myndlist hér á landi. Hann opnaði augu fólks fyrir umhverfi sínu með svo áhrifaríkum hætti að hann telst einn ástsælasti listamaður íslenskrar listasögu. Á sýningunni eru verk hans pöruð við verk samtímalistamanna þar sem finna má samhljóm hugmynda frá ólíkum tímum.

Sjá má beinar tilvísanir í verk Kjarvals í gegnum nálgun og vinnuaðferðir. Ráðandi myndefni Kjarvals var náttúran og landið. Fjallshlíðar, hraun og mosi eru listamönnunum innblástur. Tvennir tímar sýna ólíka nálgun við náttúruna, hvort sem hún er myndgerð, persónugerð eða liggur sem hugmyndalegur grunnur að verki. Staðir og dvölin í náttúrunni eru ýmist kjarni listaverksins eða sterkur áhrifavaldur í túlkun listamannanna. Landið talar til fólks á hverjum tíma og þörfin til þess að tjá þá reynslu á sinn hátt er endurnýjuð kynslóð fram af kynslóð. Verkin endurspegla fjölbreytta miðla, ólíkar stefnur og breyttan tíðaranda.

Kjarval skipar stóran sess í íslenskri menningar- og listasögu og hefur verið síðari kynslóðum listamanna fyrirmynd og innblástur. Persóna hans og lífsverk svífur yfir vötnum og er það ekki að ósekju.

Hjá Listasafni Reykjavíkur – Kjarvalsstöðum eru verk Kjarvals varðveitt og rannsökuð.

Valin verk hans eru alltaf til sýnis og  settar upp fjölbreyttar sýningar sem varpa ljósi á feril hans á breiðum grunni. Gjarnan eru dregin fram verk úr safneign eða sérsýningar haldnar þar sem afmarkaðir þættir í ferli hans og listsköpun eru rannsakaðir. Á þessari sýningu eru verk Kjarvals sett í samtal við yngri verk starfandi listamanna. Sýningin býður því upp á að kynnast enn betur einum merkasta listamanni þjóðarinnar en einnig verkum starfandi listamanna í fremsta flokki sem hafa sett mark sitt á íslenska og alþjóðlega myndlistarsenu.

Details

Start:
27 september, 2021
End:
16 janúar
Website:
https://listasafnreykjavikur.is/syningar/kjarval-og-samtiminn

Venue

Reykjavík Art Museum – Kjarvalsstaðir
Flókagata 24,
Reykjavík, Iceland
+ Google Map