Sýningin samanstendur af innsetningu nýrra skúlptúra sem og tveimur kvöldverðarboðum sem unnin eru í samstarfi við Kjartan Óla Guðmundsson, veitingamann og vöruhönnuð og Jóhönnu Rakel Jónasdóttur, myndlistar- og tónlistarkonu.

Inni á sýningunni er búið að slá upp langborði þar sem gestum verður boðið að virkja skynfærin í gegnum mat & drykk. Sérútbúinn margrétta matseðill hefur verið gerður í nánum tengslum við verkin á sýningunni. Þá hafa verkin einnig tekið á sig mynd út frá seðlinum og afraksturinn er alltumlykjandi ferðalag með tilvísanir í hina fjölbreyttu flóru og fánu íslenskrar náttúru.

Er matur list? Getur matur verið myndlist? Matur er að minnsta kosti upplifun sem virkjar skilningarvitin og getur verið hugvekjandi. En lengi hefur matargerð verið föst í þeim viðjum að vera gleðjandi og hugguleg upplifun. Líkt og ef einu leiksýningarnar væru farsar eða að rómantískar gamanmyndir væru eina kvikmyndaformið. Myndlist og önnur listform hafa hinsvegar löngu brotið niður þessa múra. Myndlist hefur leyfi til að vera allskonar; ljót, erfið og krefjandi. Undanfarna áratugi hefur matreiðsla hægt og bítandi verið að brjóta niður þessa múra og veitingastaðir líkt og El Bulli, Noma og Alchemist svo örfá dæmi séu nefnd bjóða upp á upplifun með fastmótuðum margrétta matseðlum og færa upplifunina þar með nær leikhúsi en veitingastaðir þar sem þú getur valið þér rétti af matseðli. Það er skemmtilegt að fá tækifæri til að brjóta niður þessa múra og framreiða matarupplifun þar sem unnið er í samstarfi við myndlistarmann. Úr verður túlkun á hugarheimi hans, heildstætt verk þar sem sýningar upplifunin verður margþætt samofið verk tveggja hugmyndaheima þar sem tæki og verkferlar myndlistarinnar eru notuð til að virkja öll skilningarvitin í gegnum mat og drykk.

Miðapantanir hér.