Myndlistarráð úthlutaði 22 millj. kr. í styrki til 62 verkefna í fyrri úthlutun sjóðsins á þessu ári. Sjóðnum bárust 199 umsóknir og sótt var um alls 142,9 millj. kr.
Styrkir til sýningarverkefna voru 46 talsins að heildarupphæð 16 millj.kr., þar af fóru 24 styrkir til minni sýningarverkefna og 22 styrkir til stærri sýningarverkefna. Stærsta styrkinn, að upphæð 1,2 millj. kr., hlaut Sequences IX: Real Time Art Festival. Þá hlutu Myndhöggvarafélagið og Birta Guðjónsdóttir & Hrafnhildur Arnardóttir styrki til sýninga að upphæð 1 millj. kr. hvor.
Þar að auki veitir myndlistarráð 6 undirbúningsstyrki að heildarupphæð 1,5 millj. kr., 8 útgáfu- og rannsóknarstyrki að heildarupphæð 3,5 millj. kr. Í flokki annarra verkefna hlutu tvö styrk, Kling og Bang til endurbóta og gagnabjörgunar á heimasíðu og Þorbjörg Jónsdóttir til þess að annast hreinsun og endurútgáfu á kvikmyndinni Sóley eftir myndlistarkonuna Rósku og Manrico Pavelottoni.
Listi yfir styrkþega er aðgengilegur hér.
Hlutverk Myndlistarsjóðs er að efla íslenska myndlist með fjárhagslegum stuðningi og stuðla þannig að framgangi listsköpunar, kynningu og aukinni þekkingu á íslenskri myndlist. Myndlistarsjóður heyrir undir myndlistarráð og starfar samkvæmt myndlistarlögum og eftir reglum sem menntamálaráðherra setur. Sérskipaðar matsnefndir meta umsóknir og gera tillögu að úthlutun.
Myndlistarráð sem úthlutar að þessu sinni var skipað:
Margréti Kristínu Sigurðardóttir, formanni myndlistarráðs, Guðna Tómassyni f.h. listfræðifélagsins, Dagnýju Heiðdal f.h. Listasafns Íslands, Guðrúnu Erlu Geirsdóttur f.h. SÍM og Ingibjörgu Gunnlaugsdóttur f.h. SÍM
Í matsnefnd úthlutunar sátu:
Anna Fríða Jónsdóttir, Aldís Arnardóttir, Berglind Jóna Hlynsdóttir, Ingibjörg Gunnlaugsdóttir, Hlynur Hallsson og Rósa Gísladóttir.
