Kvenleg orka yfirtekur nú Litla Gallerý með allri sinni gefandi umhyggju og næringu.Innsetningin er samsett úr verkum sem Solveig hefur unnið sl. ár og til dagsins í dag.

Solveig útskrifaðist með mastergráðu í myndlist frá Listaháskóla Íslands árið 2015 og hefur verið virk í faginu allar götur síðan. Hún vinnur þvert á miðla og sækir í þá efnisbrunna sem henta og fanga hugann hverju sinni. Helstu viðfangsefni hennar tengjast umhverfis- og samfélagsmálum og eru gjarna með feminískum tilvísunum.Kvenverurnar sem prýða sýninguna eru af ýmsum toga; þekktar þjóðsagnapersónur, brjóstgóðar kynjaverur, ástsjúkar og örvæntingafullar skessur eða gyðjur. Einnig má greina sjálfsmynd eða nk. alter egó listakonunnar.

Samfélagslegar væntingar sem gerðar eru til kvenna felast m.a. í því að vera kynvera en jafnframt geta og ala börn og vera í alla staði nærandi og umhyggjusamar. Táknmyndir konu birtast m.a. bleikum og rauðum lit, brjóstum og blóði í verkunum.