Sýningin Innrými er innblásin af hinni sérstæðu byggingu Hnitbjörgum, bæði innra sem

ytra. Einar Jónsson, myndhöggvari, skapaði í safnhúsi sínu heildstæð rými sem opnast

fyrir áhorfandanum þegar inn er stigið og hægt er að merkja í arkitektúr meðvitað

handbragð myndhöggvarans. Sigurður Guðjónsson skapar hér sín eigin rými og opnar

heima sem eru jafnan huldir með því að margstækka fyrirbæri og sýna þannig atriði sem

mannsaugað getur annars ekki greint. Hann er vanur því að takast á við sérstæð rými í

sinni sköpun, umbreyta og endurskapa þau með hljóði og mynd. Í einstökum heim

Hnitbjarga tekur hann sér stöðu með því sem fyrir er í gegnum fjölradda innsetningu sem

á sjónrænt samtal við rýmið, stöplana og bygginguna.

Sigurður Guðjónsson (1975) er hvað þekktastur fyrir tímatengda myndlist sína, þar sem

sjónum er beint að hinu innra í stækkaðri mynd. Þar rannsakar hann efnisheiminn, virkni

hins vélræna, og setur fram með hljóði, ljósi, litum og hreyfingu. Hann var fulltrúi Íslands

á Feneyjatvíæringnum 2022 og hlaut Íslensku myndlistarverðlaunin árið 2018. Styrkir úr

safnasjóði og myndlistarsjóði gerðu sýninguna mögulega.