Heildarverkið 'The Brotherhood' er innsetning sem upphaflega samanstóð af sex sjálfstæðum einingum. Verkið hafði verið í þróun yfir tíu ára tímabil þegar það var í fyrsta og eina skiptið sýnt í heild sinni árið 1998. Það var í nýopnuðu safni NTT InterCommunication Center (ICC) í Tókíó. Það er af mörgum talið vera lykilverk listamannsins Woody Vasulka (1937-2019), en Woody var ásamt konu sinni Steinu frumkvöðull í vídeólist á heimsvísu.Inntak 'The Brotherhood' er marglaga og er eitt eitt af allra fyrstu gagnvirku listaverkunum sem gerðu voru í heiminum. Woody taldi að uppruni nútíma hernaðar lægi í bræðralaginu sem reiði sig á fjölmiðlaáróður og tækni, auk þess sem verkið fjallar um karllægar hugmyndir um eyðileggingarmátt vélarinnar í samfélagi okkar. Hann varpar einnig fram áleitnum spurningum um möguleika tækninnar, og hvert tæknin muni leiða okkur, og hvort færa megi tæknileg kerfi inn á svið fagurfræðinnar. Verkin eru unnin úr fundnum tæknihlutum af haugum bandaríska hersins í Los Alamos, og þrátt fyrir að þessi uppsetning á innsetningunni hafi upphaflega átt að snúast um varðveislu og söguskráningu er óhætt að segja að inntak verkana eigi sterkt erindi við samtímann. Um listamanninn: Woody og Steina Vasulka kynntust í Prag þar sem Woody nam verkfræði en saman fluttu þau til Bandaríkjanna á sjöunda áratugnum. Í New York komust þau í kynni við framsækna listamenn á sviði nýrra miðla og stofnuðu árið 1971 The Kitchen í Greenwich Village á Manhattan, margmiðlunarmiðstöð sem starfar enn þann dag í dag. Árið 1973 tóku þau við prófessorstöðu í nýstofnaðri deild margmiðlunarfræða við SUNY-ríkisháskólann í Buffalo en fluttu síðan til Santa Fe í Nýju-Mexíkó árið 1980. Í list sinni helguðu Woody og Steina sig rannsóknum á eiginleikum vídeómiðilsins og naut tækniþekking Woodys sín vel í þeirra samstarfi, sem og hans eigin verkum, líkt og í The Brotherhood. Vasulka-hjónin hafa hlotið margskonar viðurkenningar á alþjóðavísu og verk þeirra finnast í helstu söfnum heims. Má þar nefna Pompidou safnið í París, The Museum of Modern Art í New York, Smithsonian safnið í Washington og SFMOMA safnið í San Francisco. Þar að auki hlaut hann heiðursnafnbót frá Guggenheim safninu árið 1979. Woody lést árið 2019.