Summation - Each Autonomous, and yet Together 

Í fréttatilkynningu segir að sýningin dragi nafn sitt af hugleiðingum Margrétar Þórhildar II. Danadrottningar sem lýsti norrænu samstarfi í sendiráðahúsinu árið 1999 með orðunum „Hver fyrir sig, en samt saman“. Þessi orð eru höfð að leiðarstefi sýningarinnar og segir að hún skoði samspil einstaklings og samfélags. Hún sé rómantísk melankólía um hina eilífu sammannlegu togstreitu sem felist í því að hugsa inn á við og lifa í samfélagi með öðrum. Sýningin varpi ljósi á mikilvægi samstöðu og trausts, ekki aðeins á sviði stjórnmálasamstarfs, heldur einnig milli einstaklinga í samfélagi. Með hlustun, trausti, umhyggju og virðingu skapist rými þar sem fjölbreytileiki, sköpunargleði og nýjar hugmyndir fái að blómstra.

Á sýningunni eru verk eftir tíu listamenn frá Norðurlöndunum. Ragnar Kjartansson sýnir videóverkið Hvad har vi dog gjort for at ha' det så godt sem hann vann fyrir yfirlitssýningu sína í Louisiana safninu í Danmörku og Ásta Fanney Sigurðardóttir sýnir ný verk sérstaklega unnin fyrir sýninguna. Við opnun sýningarinnar fer fram þátttökugjörningurinn Breathe With Me eftir danska listamanninn Jeppe Hein. Þar taka áhorfendur þátt með því að mála lóðréttar, bláar línur á hvítan vegg, þar sem hver lína táknar andadrátt - sameinaða öndun heimsins. Verkið var upphaflega unnið fyrir höfuðstöðvar Sameinuðu þjóðanna og Central Park árið 2019. 

Gestir sýningarinnar verða hvattir til að deila eigin hugleiðingum um áhrif listanna og um framtíðina. Þessar hugleiðingar verða settar í tímahylki sem verður opnað eftir 25 ár. 

Listamenn sýningarinnar eru A.K. Dolven, Aksel Ree, Aura Hakuri, Ásta Fanney Sigurðardóttir, Christian Partos, Hanna Ljungh, Hans Rosenström, Jeppe Hein, Mille Kalsmose og Ragnar Kjartansson.