Minningarsjóður um tvo vestfirska bræður er stofninn að Listasafni Ísafjarðar. Þeir voru Rögnvaldur Ágúst Ólafsson, hinn þjóðkunni húsameistari, sem dó liðlega fertugur árið 1917, og Jón Þorkell Ólafsson, trésmíðameistari og húsasmiður á Ísafirði, sem lést nærri hálfáttræður árið 1953. Sjóðurinn var dánargjöf Elínar Sigríðar Halldórsdóttur, ekkju Jóns Þorkels. Með erfðaskrá gaf hún nær allar eignir sínar til menningarmála á Ísafirði. Listasafn Ísafjarðar var stofnað hinn 12. febrúar 1963.