Sigrún Gyða sýnir ný og nýleg myndlistarverk úr blönduðum efniviði textíls, texta og glers. Öll eiga verkin sameiginlegt að fjalla um mörk víðfeðmis og innilokunar og tengjast óperugjörningum Sigrúnar síðustu ár á einn eða annan hátt. Verkin eru stoppistöðvar á ferðalagi þar sem stigið er niður og horft heim.

Verk Sigrúnar Gyðu liggja á mörkum myndlistar og klassískra óperutónsmíða, þar sem varpað er ljósi á hversdagslegar athafnir og þeim skeytt saman við andhverfu sína á sjónrænan hátt. Í verkum sínum fjallar Sigrún um kerfisbundið eftirlit, valdaskiptingu og líkamsvirði með vísunum í dægurmenningu og grátbrosleg mótíf. Sigrún hefur tekið þátt í fjölda sýninga og óperuverkefna sem flytjandi, tónskáld og/eða leikstjóri, bæði sjálf og í samstarfi við aðra, aðallega í Reykjavík og Amsterdam, þar sem hún er nú búsett.