Jóhanna Hauksdóttir

Elvar Gunnarsson


Brot af hvoru er heiti sýningar Jóhönnu og markast af viðfangsefni hennar sem er leikur með form gömlu árabátanna ásamt hinar óviðjafnanlegu íslensku fjallasýn og náttúru.

Skúlptúruna kallar hún Fjallabáta, enda eru þeir brot af hvoru. Þetta er fyrsta einkasýning Jóhönnu og teflir hún saman grófum og hrjúfum verkum á móti mjúkum og ljóðrænum og fær þar fram andstæður sem víða má sjá í náttúrunni.

Verkin eru annars vegar unnin úr hábrenndum steinleir sem litaður er með ýmsum litarefnum og glerungum og hins vegar postulíni sem stundum er litað. Til að ná fram þeirri áferð sem hún leitar eftir notar hún einnig ösku og vikur frá eldgosinu í Vestmannaeyjum árið 1973 og ösku frá gosinu í Eyjafjallajökli árið 2010.

Jóhanna útskrifaðist frá Þroskaþjálfaskóla Íslands árið 1987 og leirlistadeild Listaháskóla Íslands árið 2000. Hún hefur starfað við þroskaþjálfun allan sinn starfsferil og myndlist samhliða því fagi síðustu ár. Myndlistin hefur í tímans rás tekið meira pláss í lífi hennar og hafa leirskúlptúrar á vegg verið hennar helsta einkenni.

Jóhanna er fædd og uppalin í Vestmannaeyjum. Áhrif þeirrar miklu nálægðar við náttúruna og atvinnulífið kemur berlega fram í þeim verkum sem nú eru til sýnis í Litla Gallerý en þau eru sérstaklega unnin fyrir þessa sýningu..

Sýningaropnun verður fimmtudaginn 19. september 16:00-20:00 og allir velkomnir!

Viðburðurinn er styrktur af Menningar og ferðamálanefnd Hafnarfjarðarbæjar.



Sýning

Brot af hvoru

LG er vettvangur fyrir myndlistarmenn sem sækjast eftir að koma listsköpun sinni á framfæri við almenning og þannig vera virkur þátttakandi í íslenskri samtímalist. Við leggjum áherslu á myndlist í öllu miðlum og formum og viljum skapa samtal milli íslenskra og erlendra listamanna við almenning og listunnendur. Stefna okkar er að vera aðdráttarafl fyrir hafnfirskt list- og menningalíf með því að halda úti reglulegum sýningarviðburðum. Rýmið er rekið án hagnaðarsjónarmiða.