Myndbandsinnsetning Siggu Bjargar Sigurðardóttur er unnin sérstaklega fyrir sýninguna en hún vinnur jöfnum höndum að hlutbundnum og óhlutbundnum teikningum á pappír, málar og teiknar beint á veggi. Hún hefur skapað fjölmörg myndbandsverk er byggja á stop-motion tækni þar sem hver rammi hreyfimyndarinnar er handteiknaður. Hljóðheimur innsetningarinnar er unninn af tónlistarmanninum Mikael Lind. Í verkum Siggu Bjargar mætast gjarnan skrautlegar kynjaverur og litríkur hliðarheimur, sem gefur til kynna að skynjunarvíddirnar séu fleiri en fimm og veita innsýn í magík og möguleika okkar til að vefa saman flóknari raunveruleika-mynstur en við könnumst sjálf við, og þræða okkur þannig eftir ófyrirsjáanlegum leiðum inn í framtíðina.