Listasafn Reykjavíkur og útgáfufyrirtækið Eirormur kynna útgáfu viðamikils bókverks eftir Oddnýju Eir, Guðrúnu Kristjánsdóttur og Snæfríð Þorsteins en verkið birtir kjarna arfleifðar myndlistarkonu og um leið margra ára samvinnu mæðgna á sviði listarinnar. Bláleiðir er flettirit, listrænn leiðarvísir um auðn, innlönd, umbreytingar, náttúruvernd, bláma og þrá. Við sláumst í för með myndlistarkonu sem í fjöldamörg ár ferðaðist um landið og skráði hjá sér íhuganir sínar og upplifanir. Tilraun hennar til að gera náttúruupplifun sinni skil á mörkum myndlistarstefna og miðla og skapa sér vinnurými í fjölskyldulífi birtist í bókverkinu sem eins konar uppgjör. Oddný Eir rithöfundur veitir persónulega innsýn í æviverk listakonunnar móður sinnar Guðrúnar Kristjánsdóttur en verkið er unnið í náinni samvinnu þeirra og Snæfríð Þorsteins hönnuðar. Aðaltexti bókarinnar, sjálfsævisagan Bréf til Luise, er einnig á ensku í bókverkinu.